Fimmtudagurinn 30. mars

Vinamorgnar með breyttu sniði

Árskorthafar undanfarinna ára eru farnir að kannast vel við fyrirkomulag svokallaðra vinamorgna í Fjölskyldu- og húsdýragardinum. Í ár ætlum við að breyta til og í staðinn fyrir að bjóða upp á skítmokstur og almenn þrif í útihúsunum viljum við bjóða árskorthöfum með núgildandi kort að bjóða fram krafta sína við morgungjafir allar helgar í nóvember (fyrsta helgina er 31.október og 1.nóvember). Hafist er handa við að gefa hreindýrum kl. 10:45, síðan selum kl.11:00 og að endingu refum og minkum kl.11:30. Inn á milli gjafa munu dýrahirðar kynna árskorthafa fyrir öðrum íbúum garðsins. Ekki þarf að panta fyrirfram eins og áður hefur verið, aðeins bjóða fram krafta sína við dýrahirði á vakt sem tekur þennan rúnt ásamt aðstoðardýrahirðum alla morgna um helgar í nóvember. 

 

 

Dagur íslenskrar náttúru 16.september

Í tilefni dagsins verður opið inn í Hafrafell þann 16.september þar sem búið verður að setja upp sýningu með broti af þeim uppstoppuðu fuglum sem til eru í safnkosti garðsins. Fyrir fimm árum fékk garðurinn til varðveislu töluverðan fjölda af uppstoppuðum dýrum sem áður voru í eigu Þórarins Þorkels Jónssonar endurskoðanda sem verða uppistaðan í sýningunni auk annara muna. 
Fræðslufulltúrar garðsins verða á staðnum en þær munu bjóða upp á hænuegg orpin í garðinum, bjóða gestum að gefa hænum garðsins að éta auk þess að vera til staðar til skrafs og ráðagerða. 
Skólahópar sem ætla að leggja leið sína í garðinn þennan dag eru hvattir til að týna allt það rusl sem á vegi þeirra verður en á staðnum verða laupar að fyrirmynd hrafnslaupa sem allt ruslið verður sett í. Skólahópunum sem koma með nesti verður frjálst að nota laupana til að borða í annars er nestisaðstaða með stólum og borðum í tjaldinu við veitingahús.

Uppskera býbænda, Hálandaleikar og síðasta opnunarhelgi leiktækjanna framundan.

Uppskeruhátíð býflugnabænda verður haldin í veitingatjaldi Fjölskyldu- og húsdýragarðsins laugardaginn 5. september milli kl 14.00 og 16.00. Býbændur sýna sig og sjá aðra, gefa gestum kost á að fræðast um býrækt ásamt því að bragða og kaupa íslenskt hunang.  Þá verður ýmis búnaður tengdur býflugnarækt sýndur og lifandi býflugur til sýnis. Kvenfélagasamband Íslands verður með sultukynningu á sama tíma.  Berjaspretta hefur verið misgóð eftir landshlutum þetta árið en vonandi að allir hafi fengið sitt og húsmæður og –feður geta því leitað upplýsinga í raðir félaga í Kvenfélagasambandinu til að nýta berin.  Húsfreyjan, tímarit Kvenfélagasambands Íslands mun liggja frammi. 

Íslandsmót í Hálandaleikum verður laugardaginn 5.september og hefst kl. 12:00 í garðinum. Karlar keppa í 7,3 kg steinkasti, 12,6 kg lóðkasti á vegalengd, 10 kg sleggjukasti, 25 kg lóðkasti yfir rá og staurakasti. Konur keppa í 4 kg steinkasti, 6,6 kg lóðkasti á vegalengd, 7,3 kg sleggjukasti, 12,6 kg lóðkasti yfir rá og staurakasti. Sigurvegarar verða krýndir Íslandsmeistarar 2015. Það eru 9 karlar og 5 konur skráð til leiks og þar á meðal er Íslandsmeistari karla 2014, Heiðar Geirmundsson og  Íslandsmeistari kvenna 2014, Þóra Þorsteinsdóttir. Mótið hefst á sleggjukasti, síðan verður steini kastað, lóði á vegalengd, lóði yfir rá og endað á staurakasti og reiknað er með að mótinu ljúki um kl. 15:30 með verðlaunaafhendingu. Yfirdómari er Pétur Guðmundsson.

Sunnudaginn 6.september munu fræðslufreyjur garðsins, Unnur Sigurþórsdóttir og Lilja Björk Vilhelmsdóttir bjóða gestum upp á leiðsögn og segja sögur úr garðinum í tilefni af 25 ára afmælisári Fjölskyldu- og húsdýragarðsins.   Leiðsögnin hefst kl. 13:00 við miðasöluna. 

Þá er þetta síðasta helgin sem öll leiktækin eru opin í ár.  Vetraropnun hefur tekið gildi og verður opið alla daga kl: 10 -17 í allan vetur.

Vetraropnun

Næstkomandi mánudag (24.ágúst) breytist opnunartími garðsins frá því að opið sé frá 10-18 alla daga í að opið verður 10-17 alla daga og tækjum verður lokað. Tækin verða hins vegar í gangi síðustu helgina í ágúst (29. og 30.ágúst) og fyrstu helgina í september (5.og 6.sept) eftir það verða þau flest sett í vetrardvala. Starfsemi garðsins breytist aðeins á veturnar en þá er kjörið að koma og heimsækja dýrin og nýta Fjölskyldugarðinn til útivistar. 

 

 

Frá Mývatni til Vatnsmýrar

Fyrr í sumar kom sending af andaeggjum úr Mývatnssveit í Fjölskyldu- og húsdýragarðinn.  Ástæðan er verkefni í samstarfi við Reykjavíkurborg sem lýtur að því að fjölga andategundum á ný í Vatnsmýrinni. Eggin voru sett í útungunarvél í garðinum og úr eggjunum skriðu átta ungar.  Sjö þeirra fluttust á dögunum í Vatnsmýrina en einn ungi sem hefur verið kallaður "Ninja" unginn meðal starfsmanna sýndi ótrúlega færni í feluleik og lék á starfsmenn í hvívetna svo hann mátti dvelja aðeins lengur í garðinum.  Hann hefur nú verið fangaður og hittir félaga sína um fjögur leytið í dag fimmtudag í nýjum heimkynnum.  Ungunum sem eru sjö gargendur og ein rauðhöfðaönd var sleppt í litla girðingu við tjörnina til að byrja með og þar verða þeir fóðraðir meðan þarf.  Vonir eru bundnar við að þeir spjari sig og læri vel á lífið og tilveruna, finni sér maka og haldi tryggð við Vatnsmýrina. 

 

Athugið

Ekki er leyfilegt að koma með gæludýr inn í garðinn.

Öll umferð hjóla, hlaupahjóla, skauta, hjólabretta og annarra slíkra farartækja er óheimil innan garðsins.

Pets are not allowed in the park.

Bicycles, scooters, skates, skateboards and other such vehicles are not allowed inside the park.

Skemmtimiðar

Skemmtimiðar 

1 miði 320 kr
10 miðar 2.550 kr
20 miðar 4.750 kr
Dagpassi 2.200 kr*

*Aðgangseyrir er ekki innifalinn í verði dagpassa.

Aðgangseyrir

Börn 0-4 ára - frítt
Börn 5-12 ára - 650 kr
13 ára og eldri - 860 kr
Öryrkjar - frítt
Ellilífeyrisþegar - frítt
 
Veittur er 10% afsláttur af aðgangseyri ef greitt er fyrir 10 eða fleiri í einu.
 
Einstaklingsárskort - 9.800 kr
Fjölskylduárskort - 19.200 kr
 
Plús* á Fjölskylduárskort - 9.800 kr hver plús 
*(Plús - bjóddu hverjum sem er með í garðinn)

Opnunartími

Opið er alla daga frá 10-17

 

Opnunartími Kaffihúss:

Virkir dagar: 10-16:30

Helgar: 10-16:30