Brimillinn Snorri allur

snorri allur

Á dögunum gerðist hið óumflýjanlega að brimillinn Snorri sem búið hefur í Húsdýragarðinum frá 1990 kvaddi þessa jarðvist og hélt á fund feðra sinna. Snorri náði háum aldri, en hann var fæddur 1989 og var því þrítugur þegar hann kvaddi. Síðustu mánuðina hafði Snorri sýnt merki þess að aldurinn væri farinn að færast yfir og heilsu hans fór hratt hrakandi síðustu dagana. Landselsbrimlar verða eftir því sem næst verður komist yfirleitt ekki mikið eldri en 25 ára. Urturnar geta orðið nokkuð eldri, en þær stöllur Kobba og Særún sem dvalið hafa með honum í garðinum eru á sama aldri og hann. Þríeykið voru því elstu dýr garðsins fædd rétt fyrir opnun Húsdýragarðsins.

Það var vel við hæfi að nýverið kom nafni Snorra, Helge Snorri Seljeseth fiðluleikari og lék létta fiðlutóna fyrir selinn en hann var einmitt skírður í höfuðið á honum.