Lífveruleit í Laugardalnum

Lífveruleit

Í júlí verður í boði skemmtilegt tækifæri fyrir gesti Grasagarðsins og Fjölskyldu- og húsdýragarðsins að gerast sjálfstæðir náttúrufræðingar og kynna sér lífríki Laugardalsins. Alls konar lífverur, dýr, plöntur og sveppir hafa valið Laugardalinn sem sitt heimili. Þá er átt við þær lífverur sem eru þar á eigin vegum, ekki plönturnar sem eru ræktaðar í Grasagarðinum eða húsdýrin í Fjölskyldu- og húsdýragarðinum. Þetta eru t.d. þrestirnir í trjánum, ánamaðkarnir í moldinni, hunangsflugurnar sem suða í blómabeðunum, fíflarnir sem vaxa upp úr stéttinni og svo fram vegis. Það opnast fyrir manni heill heimur þegar grannt er skoðað. Alls staðar finnur lífið sér pláss !

Til að taka þátt í lífveruleitinni má nálgast fróðleiksspjöld, annað hvort í afgreiðslu Fjölskyldu- og húsdýragarðsins, eða í Kaffi Flóru í Laugardal. Spyrjið starfsfólkið ef þið finnið ekki spjöldin. Á spjaldinu eru nokkur einföld verkefni/viðfangsefni þar sem þátttakendur eru hvattir til að leita að ákveðnum gerðum lífvera og velta fyrir sér nokkrum áhugaverðum spurningum. Allt mjög einfalt og þægilegt og hægt að framkvæma hvar sem er í Laugardalnum þar sem lífverur finnast.

Lífveruleitin er samstarfsverkefni Fjölskyldu- og húsdýragarðsins, Grasagarðs Reykjavíkur og Reykjavík-iðandi af lífi en hið síðastnefnda er sérstakt fræðsluátak um líffræðilega fjölbreytni í borginni.

Verið með í lífveruleit í júlí í sumar.  Tilvalið fjölskyldufjör á rólegum sumardegi.