Yrðlingurinn Heiða kom í umsjá Dýraþjónustu Reykjavíkur eftir hrakningar í borgarlandinu. Hún hefur dafnað vel og henni hefur nú verið sleppt á útisvæði við loðdýrahúsið í Fjölskyldu- og húsdýragarðinum. Hún fær þó ekki að vera með tófunum Ylfu og Ynju sem búa á refaóðalinu, enda eru þær systur búnar að helga sér það svæði og yrðu alls ósáttar við nýjan íbúa. Tófurnar þrjár eru allar aldar á hundafóðri að staðaldri enda náskyldar besta vininum en fá oft aukabita og er það þá helst egg, kjöt og fiskur sem er á boðstólnum.
Eitt af hlutverkum Dýraþjónustu Reykjavíkur er að koma dýrum sem lenda í vandræðum innan marka borgarinnar til aðstoðar. Vandræðin geta verið af ýmsum toga allt frá því að dýrin séu illa slösuð í að þau þurfa smá aðstoð við að komast á öruggan stað eins og raunin er með til dæmis sjófugla sem villast af leið.
Verði fólk vart við dýr í vanda i Reykjavík bendum við á að hægt er að leita upplýsinga hjá Dýraþjónustu Reykjavíkur en sé dýrið innan marka annars sveitafélags skal leita þangað skv. reglugerð.
