Fjölskyldu- og húsdýragarðurinn er nú fagurlega skreyttur hundruðum þúsunda jólaljósa og fólk og dýr óðum að komast í mikið jólaskap. Garðurinn verður opinn lengur á laugardögum og sunnudögum á aðventunni eða frá kl. 10 til 20. Aðventuhelgarnar eru 29. og 30. nóvember og helgar í desember til jóla.
Kerti og eldar munu loga víða um garð síðdegis á laugardögum og sunnudögum og gestum verður boðið í hringekjuna frá kl. 16 til 20. Dagskrá í kringum dýrin verður með jólablæ og eflaust kærkomið hjá mörgum að hvíla sig á amstri jólaundirbúningsins í kringum dýrin. Jólakötturinn verður á sínum stað alla daga og seinni partinn hefst dagskráin á því að hreindýrunum er gefið kl. 15:30 og lýkur í fjósinu kl. 16:30 en þess á milli er smádýrum og selum gefið. Fræðslufreyjur lesa jólakattasögu í fjósinu alla virka daga frá 15. til 19. desember kl. 10 og 10:30.
Stilltir og heilsuhraustir hundar, skráðir hjá sveitarfélagi, eru velkomnir með í heimsókn í garðinn alla miðvikudaga og á aðventunni verða þeir einnig velkomnir með alla sunnudaga, það er 30. nóvember og 7., 14. og 21. desember. Þeir skulu vera í stuttum taum og á ábyrgð fullorðins.
Bæjarins Beztu verða með opið um helgar og lofa jólastemningu þar sem mögulega verður hægt að grípa í spil og föndra eitthvað í rólegheitum.
Sauðfé garðsins verður rúið laugardaginn 29. nóvember þegar Jón bóndi í Mófellsstaðakoti mætir með klippurnar. Hann hefst handa kl. 15:00 og verður við störf fram undir kvöld.
Skólahljómsveit Grafarvogs mun skemmta gestum sunnudaginn 7. desember kl. 17:30 og Skólahljómsveit Árbæjar og Breiðholts laugardaginn 13. desember og sunnudaginn 14. desember kl. 17:30.
Virka daga verður opið frá kl. 10 til 17 en á aðfangadag, gamlársdag og nýársdag verður opið frá 10 til 15 og lokað á jóladag. Hefðbundinn aðgangseyrir verður allan desember.
