Um helgina (30. og 31. maí) verður nóg um að vera í Fjölskyldu- og húsdýragarðinum þar sem Menningarsendiherrar bjóða í Menningargarðinn á laugardaginn og nemendur í Skólahljómsveitum Reykjavíkur halda uppskeruhátíð sína á sunnudaginn. Opið verður báða dagana frá kl. 10 til 17, en breytt verður í sumaropnunartíma mánudaginn 1. júní og þá verður opið alla daga frá kl. 10 til 18 og leiktæki verða opin alla daga vikunnar frá 30.maí fram að grunnskólabyrjun í lok ágúst.
Í Menningargarðinum verður gestum boðið að fagna fjölbreytileika og kynna sér mat og menningu víða að úr heiminum í fallegu umhverfi og upplifa fjölskylduvæna stemningu. Dagskráin stendur frá kl. 12 til 16 laugardaginn 30. maí og ókeypis verður inn í boði Menningarsendiherranna.
Sunnudaginn 31. maí halda skólahljómsveitir Reykjavíkur uppskeruhátíð í Fjölskyldu- og húsdýragarðinum. Lúðraómur mun fylla Laugardalinn en í sveitunum eru um 600 ungir hljóðfæraleikarar.
Hljómsveitirnar sem munu leika fyrir gesti í Fjölskyldu- og húsdýragarðinum eru Skólahljómsveit Árbæjar- og Breiðholts, Skólahljómsveit Grafarvogs, Skólahljómsveit Austurbæjar og Skólahljómsveit Vesturbæjar og Miðbæjar.
Allar þessar hljómsveitir hafa á að skipa þremur aldursskiptum hljómsveitum A, B og C. Það verða því 12 sveitir sem munu spila á tveimur sviðum og marsera um garðinn frá kl.13.00 – 17.00.
Hljómsveitirnar sem munu leika fyrir gesti í Fjölskyldu- og húsdýragarðinum eru Skólahljómsveit Árbæjar- og Breiðholts, Skólahljómsveit Grafarvogs, Skólahljómsveit Austurbæjar og Skólahljómsveit Vesturbæjar og Miðbæjar.
Allar þessar hljómsveitir hafa á að skipa þremur aldursskiptum hljómsveitum A, B og C. Það verða því 12 sveitir sem munu spila á tveimur sviðum og marsera um garðinn frá kl.13.00 – 17.00.
Leiktæki verða opin og dýrin að sjálfsögðu heima við og hefðbundin dagskrá í kringum þau.
