Hrekkjavakan rennur upp laugardaginn 31. október og þá verður henni fagnað í Fjölskyldu- og húsdýragarðinum. Frá kl. 15 til 17 verður boðið upp á andlitsmálun, búningadiskó með Dj Dóru Júlíu í veitingaskálanum og draugar og skrímsli frá Pilkington Props og Hringleik verða á vappi. Þá gefst gestum kostur á að kíkja á ungu leikara í útileikhúsinu Völundarhúsinu. Um er að ræða sviðslistaupplifun í boði ungra leikara úr nærumhverfi garðsins. Hleypt verður inn á 12 mínútna fresti og takmarkaður miðafjöldi. Miðar eru ókeypis en fást við inngang Völundarhússins sem er við hlið Ökuskólans í Fjölskyldugarðinum.
Hefðbundinn aðgangseyrir gildir í garðinn og dagskrá í kringum dýrin verður með hefðbundnum hætti. Opið verður í fallturni, rugguskipinu, ökuskóla og lest.
Undirbúningur er nú hafinn við að koma garðinum í jólabúning og við hvetjum áhugasöm að fylgjast vel með upplýsingum um jóladagskrána okkar sem birtist á allra næstu dögum.
